Sun, 21 Jul 2019

Cebuano News: Molmol, angay panalipdan pasanayon, dili na kuhaon

Philippine Information Agency
27 Jun 2019, 18:38 GMT+10

TAGBILARAN CITY, Bohol, June 26 (PIA)-Nasayud ka ba nga ang bonbon sa kabaybayonan dili lang nahimo tungod sa pagpangapugday sa gasang nga ma-ligsan sa dagkong bawod ug uban pa'ng pwersa nga makapulpog niini?

Piskay man nga higda-higdaan samtang nagpa-init sa adlaw, dako nga bahin sa bonbon nga imong gilubgan, ginawas sa ginhawaan sa mga isda nga molmol.

Lami-an lutuon nga inun-onan o nilarang, maayo usab nga kilawon, ang molmol maoy usa sa mga naghatag og pino nga bon-bon, nga iyang kinalibang.

Ang mol-mol o sa inengles, parrot fish may mga sungo nga sama sa periko ug ang iyang kolor, sama usab ka anindot sa mga mabulokon nga langgam.

Ang molmol ang iyang kan-onon kadtong mga lumot nga kasagaran manuksok sa mga gingi-gingi sa mga gasang ug bato-bato sa dagat.

Matud sa usa ka diver nga si Holger Horn, ang molmol usa sa labing importante nga isda sa kadagatan sa Panglao.

Nobenta porsyento sa kinabuhi sa molmol, nag-ob-ob og bato ug patay nga gasang

Aron makuha kining mga lumot, kitkiton sa molmol ang mga bato ug tupsan, samtang nagkaon sa mga lumot, ang bato nga gikitkit, gigaling sa tiyan ug kadtong dili na mahilis pa, igawas nga bonbon.

Gani, sa mga tigpamana, usa sa ilang mga timailhan sa molmol, kon may agbon sa bonbon nga nagagikan sa tiyan sa isda.

Ang molmol, sa uban nga kultura sa kalibutan, giisip nga pagkaon sa mga hari, apan dinhi sa ato, padayon nga gikuha aron sud-anon.

Tungod niini, may kahingawa na nga gipadayag ang uban nga mga tigpanawom ug kadtong may kaikag nga ipatunhay ang kahimtang sa kadagatan.

Kon ipadayaon ug dili kahimo-an og paagi, mahimo nga masubrahan og kuha ang mga molmol, nga makaapekto unya sa kabaybayonan, gawas pa nga kini sila maoy nagkontrolar sa pagdaghan sa lumot sa kabaybayonan.

Gani, butyag sa langyaw nga diver nga nanimuyo na sa Bohol, ang labing mahinungdanon nga trabaho sa molmol mao ang paglimpyo sa mga kapasilan ug kagasangan gikan sa mga lumot, nga makapatay usab sa gasang.

Kon magpadayon ang pagpanguha sa molmol ug pagpakunhod sa iyang gidaghanon, mahimo nga mameligro ang mga gasang tungod kay ang tiglimpyo niini, gihurot na'g kaon sa tawo.

Tungod niini, hangyo ni Horn, ayaw nag kuhaa ug likay ang pagpalit niining matang sa isda.

May importante pa kini nga manglimpyo sa kagasangan ug manghimo og bonbon kay dahgan na nag isda ang nahanaw na sa mga kagasangan sa Bohol, panapos nga hangyo ni Horn, kinsa commander sa Auxiliary Coast Guard sa Bohol. (rahc/PIA-7/Bohol)

More United Kingdom News

Access More

Sign up for Britain News

a daily newsletter full of things to discuss over drinks.and the great thing is that it's on the house!