Mon, 09 Dec 2019

Cebuano News: DTI mipasalig: wala na'y pagsaka sa presyo sa 2019

Philippine Information Agency
21 Nov 2019, 22:38 GMT+10

TAGBILARAN CITY, Bohol, Nov. 18 (PIA) -- Wala na'y pagsaka pa sa mga presyo sa mga batakan nga mga panginahanglanon ug nag-una nga mga paliton, kini maoy pasalig sa Department of Trade and Industry (DTI).

Sa kalit nga pagsubay sa DTI sa mga presyo sa paliton ug panginahanglanon sa mga tindahan sa Bohol, gipasalig usab sa kagamhanan pinaagi ni Undersecretary for Consumer Protection Group, Usec Ruth Castelo, ngadto sa mga sakop sa media nga nangayo sa iyang pamahayag nga ilang bantayan ang mga pagpasaka sa presyo unya nga himoon sa mga mosakay sa panahon sa Pasko.

PRESYO MONITOR. Gisubay sa DTI ang mga presyo sa mga paliton dinhi sa Bohol aron kapanalipdan ang mga konsumidor ilabi na sa walay katarungan nga pagtaas sa presyo sa mga paliton. (rahc/PIA-7/Bohol)

Kahinumduman nga gipagawas sa DTI ang labing bag-o nga gisugyot nga presyo sa tigi-tigi o suggested retail prices (SRP) sa mga nag-unang panginahanglanon ug paliton niadtong Hunyo 2019.

Lakip sa mga nag-una nga panginahanglanon nga kansang presyo gilansang sa DTI mao ang mga sardinas nga delata, giproseo nga gatas ug gatas nga kondensada, gatas nga evaporada, kape nga naa sa pakete, kape nga 3 in 1, pan (tinapay), instant noodles nga chicken ug beef, asin, iodized nga asin, sabon panglaba, tubig nga binotelya, mineral nga tubig ug kandila.

Sa laing bahin, ang mga nag-una nga paliton naglangkob sa luncheon meat, meat loaf, corned beef, beef loaf, suka sa botelya, suka sa pakete, patis, toyo, sabon ikaligo, ug mga baterya.

Kini sanglit gimandu sa Batakang Balaod nga ang estado kinahanglang manalipod sa mga kabus pinaagi sa pagseguro nga may mapalit ug barato nga mga panginahanglanon ug paliton, ilabi na kon maghisgut na sa dyutay ug ubos nga suholan samtang bantayan nga dili mahikawan ang mga negosyante, segun sa Fair Price Act.

Gimbuhaton usab sa estado, subay sa nasampit nga balaod nga ang estado gikinahanglan nga mag lutos niadtong magtipig sa produkto aron ikapalobo ang presyo dala sa nagnihit nga panahon.

Gawas sa pagtipig (hoarding), ang pagpasobra sa pagpaganansya sa mga hinungdan sa kanihit, ug sa mga sindikato nga mosakay sa naglisud nga panahon sama sa panahon sa katalagman ug sitwasyon nga may emerhensya, bantayan usab sa DTI. .

Subay niini, gimandu ang paglansang sa mga presyo sa mga nahisgutan nga panginahanglanon subay usab sa rekomendasyon sa local nga Price Councils.

Gikan sa Hulyo, wala nay mapaabut pa nga pagsaka sa presyo sa nga paliton, saysay ni Usec Castelo.

Ang pagtumbok sa gisugyot nga presyo, magbasi usab sa average nga presyo niini sa milabay nga tulo ka buwan, ang supply niini sa merkado, sa presyo nga gimantala sa mga taga-planta segun usab sa baylo sa dolyar, presyo sa mga sahug sa paghimo sa produkto, pagsaka sa suholan, ug ang pagpadeliver niini ngadto sa mga tindahan.

Apan, niadtong Agosto, dihang namatikdan ang sakit nga African Swine Fever sa Luzon, mag milutaw nga mga kahadlok nga kini makapanihit sa karne sa baboy kay may posibilidad nga wala nay mapalit tungod kay mahimong kini maoy hinungdan nga may pagkatag sa kagaw ug may matakdan.

Apan, bisan pa sa pagpugong sa pagpasulod sa karne sa baboy gikan sa gawas sa lalawigan sa Bohol, wala pa mamatikdi nga may pagkunhod sa mapalit nga karne.

Gani, daghan na ang namaligya og baboy sa ubos nga presyo, segun sa mga nakasinati sa industriya sa pangbabuyan.

Aron walay artipisyal nga pagsaka sa presyo, gipasaliug usab ni Usec Castelo nga magpadayon ang DTI sa paghimo sa sinemana nga pagsubay sa mga presyon kon kini haum pa ba sa unang gipagawas sa DTI. (rahc/PIA-7/Bohol)

Sign up for Britain News

a daily newsletter full of things to discuss over drinks.and the great thing is that it's on the house!